مالفرق بين العائلة السعوديه والسورية مثلا؟!

بنت ضرماء · #1 09-Jun-2005, 10:32 AM

مالفرق بين العائلة السعوديه والسورية مثلا؟!

هذا كاريكاتير يظهر سيارتين إحداهما لعائلة سعودية يقودها الأب و الأم بجانبه و الأولاد في الخلف الفوضى تعم السيارة .. و السيارة الثانية لعائلة غير سعودية يسودها الهدوء و لنتخيلها سورية لأني أعتقد أن السوريين منظمين أفضل من بقية الجنسيات العربية ..
عموما دعونا نتخيل حوارا دار داخل كل سيارة....................................
السيارة الأولى : عائلة السعودي ( أب و أم و ولد وبنت .. ما نبي نكثرهم علشان يكون فيه تركيز في الحوار )
الأب : هاه ما قلتوا لي وين بتروحون ؟
الأم : و بعد بتشاورهم ؟! أنا قلت نروح لصحارى بلازا يعني صحارى بلازا ( سوق تجاري شمال الرياض )
البنت : لا يمه ملينا منه .. كل شوي نروح له خلينا يمه نغير
الأب : شوفي يا بنت الحلال .. سوق مانحن برايحين .. تراني مليت .. راحت فلوسي على هالملابس و الخلاقين .
الولد : ( يصرخ ) يبه يبه
الأب : ( بغضب ) وش تبي وجع ؟
الولد : ليش ما تودينا للثمامة و نشوف اللي يطعسون و هناك فيه عسكريم وشاورما و ببسي
الأب : أقول انثبر يالله .. تبي تودي أمك و أختك عند الشباب ياللي ما تستحي
الولد : وش فيها يبه أماهم متغطين
الأب : ولو .. انطم بس انطم
ينطم الولد و يسود الصمت لحظات ...
-------------------------------------------
السيارة الثانية : العائلة السورية ( أب و أم و ولد وبنت )
الأب : لَك يا إم إياد .. جبت الفواكه معاك
الأم : آه جبتا تئبر عيني .. وجبت المي و الزاندويتشات كمان
الأب : تسلميلي عيني .. بدنا نئضي وئت حلو بالحديقة .. بدنا نشم هواء و نهدي أعصابنا
الأم : الله يخلينا إياك ابن عمي ..
الولد : لو سمحت بابا ممكن أحكي
الآب : آه أحكي ابني .. شو بدك بابا
الولد : ممكن تشتري لي قصة جديدة لأنو كل القصص اللي عندي صرت آريهون عشر مرات
الأم : ولا يهمك ابني أنت الأول على فصلك و انت بتستاهل كل إشي
البنت : و أنا ماما .. بعد إذنك بدي عروسه
الأم : لك ماما وين عروستك اللي اشتريتها لك من إشي خمس سنوات
البنت : بعد إذنك يا ماما و بعد إذنك يابابا بدي أهديها لرفيئتي بالفصل نسرين لأنها مؤدبة و خلوئة كتير
الأب : ما مشكلة إهديها للبديك إياه وأنا مع الراتب الجاي راح أشتري لك عروسة زريفة كتير ..
البنت : شكرا يا بابا و شكرا ياماما و أنا أوعدكم أني راح أزاكر كتير علشان أطلع الأولى مثل العادة و أرفع رأسكن ..
---------------
السيارة الأولى :
البنت : يمه يمه
الأم : عمى وش عندس ؟
البنت : دحيم وطى رجلي
الأم : ترى يعلم الله يا دحيم إذا ما صرت رجال إني لأعلم أبوك وش انت مسوي اليوم الظهر ؟
الأب : وش هو مسوي ؟
الأم : أقول ولا بتووب
الأب : وش أنت مسوي .. طاق الشغالة ؟ ولا تافل في وجها ؟ إيه عارفك هذي عوايدك ؟
الأم : لا ذي ولا ذي .. إلا شايتن القطوة برجله إلين ماتت..
الأب : أشوى أحسبه قايل شي للشغاله .
----------
السيارة الثانية :
( سيارة مسرعة تمر أمام سيارتهم و تكاد تصدمهم )
الأب : العمى شو هالسواقة
الأم : إيه الله يسامحه .. خليه يفووت
الأب : لك بنت عمي ؟
الأم : نعم تئبر عيني .. بدك شي ؟
الأب : كم باقي من الراتب؟
الأم : باقي كتير .. خير ربنا كتير..
الأب : يعني بنئدر نشتري للولد القصة اللي بدوه إياها و البنت كمان العروسه اللي بدها إياها
الأم : آه ممكن عيني .. وكمان بقدر أشتري كتاب أو اثنين علشان أسلي نفسي بيهم
الولد : بابا
الأب : نعم بابا
الولد : إذا ما عندكو أنا ممكن أشتري القصة من مصروفي
الأب : لك إبني أنت بتستاهل كتير ..أنا راح أشتري لك القصة آخر الشهر لما أروح للكمتبة علشان أشتري رواية جديدة إلي .
السيارة تصل للحديقة العامة و ينزل الجميع من السيارة بهدوء و بدون ضوضاء .
-----------------
السيارة الأولى :
تمر سيارة و تحد الأب و تكاد تصدمه
الأب : تعال يابن الكلب قسم ما أخليها لك ، الله ... من جابك
الأم : يا ابن الحلال تعوذ من الشيطان و اتركه يروح ولا تقلبنا
الأب : انتي اسكتي مالس دخل
الولد: يبه قرب جنبه علشان أصقعه بقارورة الموية اللي معي
البنت : و أنا أبتفل عليه
الأب: أنحاش ابن ال... لكن يا هو ثور دمي الله يثور دمه
الأم : يا بان الحلال قايلتن لك اتركه عنك و خلنا نروح للسوق ترانا تأخرنا
الأب: سوق لا ما نيب رايح .. لا تخليني أحلف أنك ما تطيبنه حياة عينس
الأم : أعوذ بالله ما قلت لك شي وقلت إيه أعوذ بالله ( تلتفت بوجهها إلى الجهة الأخرى زعلانه يعني )
الولد : يبه
الأب : مصع وش تبي أنت بعد
الولد : ليش أمي ما تركب ورى الرجاجيل قدام و الحريم ورى
الأم : مابقي إلاهي طول عمري أركب ورى إلين أخذت أبوك و تبيني أركب ورى أنطم بس هين أوريك ما أشتري لك همبرجر و ببسي
الأب يقف بسيارته عند سوق صحاري .. تخبرون ما يقوى ينفذ تهديده ..

م ن ق و و و ل

الخـارج عن القـانون · #2 09-Jun-2005, 04:42 PM

خخخخخخخخ حلوووووه بس تدرين هذا الحقيقه مشكوره اختي على النقل تحيه طيبه لك
الخارج عن القانون

أميـــرة الــــورد · #3 09-Jun-2005, 11:12 PM

الأم : مابقي إلاهي طول عمري أركب ورى إلين أخذت أبوك و تبيني أركب ورى أنطم بس هين أوريك ما أشتري لك همبرجر و ببسي
الأب يقف بسيارته عند سوق صحاري .. تخبرون ما يقوى ينفذ تهديده ..

****************
هههههههههههههههههههههخخخخخخخخخخخخخخخخخخ

<<<<<<<<<<<<<< ودها تركب قدام (( أمنيات عانس ))

من جــــــــــد حلووووووووووووووووووووووووووووووه المقارنه ... :)

الله يرجس على أختيارك في نقل المواضيــــــــــــــــع ..

يعطيك العافيـــــــــــــه ... بنت عمي ؟
<<<<<<<<<<<<<<<<<<<<<<<<< تحسبها مدحه
بس حلوه بنت عمي ..

تحياتي

ابن نمش · #4 10-Jun-2005, 05:59 AM

هههههههههههههههههههههههههههه

حلوه كتير <====== يقال انه من السياره الثانيه

صدقتي بالنقل

ولا تعتبر العائله السعوديه هذي مهذبه بعد فيه اكثر مشاكل من ذولي

تشكرين على النقل

ابونادر · #5 18-Jun-2005, 04:01 AM

بنت ضرماء

اعتقد انه لايجوز لاشرعا ولاعرفا الاعتدا على حقوق الغير

فانتي اعتديتي على حق غيرك في ضح النهار اليسى كذلك ؟؟

فهذه القصة لشخصية معروفة ومنشورة في احدى المنتديات المحترمة

ارجومن ادارة المنتدى التحقق من الموضوع ومن عنده هشك لدي الدليل ،،،

وشكرا

ابن نمش · #6 18-Jun-2005, 06:37 AM

ابو نادر

شكر لك على التذكير ولكن بنت ضرماء ماقصرت

كتبت الموضوع وكتبت انه منقول

في آخر الموضوع

ويعطيك العافيه

ابونادر · #7 19-Jun-2005, 12:53 AM

اقتباس:

المشاركة الأصلية كتبت بواسطة ابن نمش

ابو نادر

شكر لك على التذكير ولكن بنت ضرماء ماقصرت

كتبت الموضوع وكتبت انه منقول

في آخر الموضوع

ويعطيك العافيه

******************************************
اخــوي ابن نمش

اعتذر لك وإلى الاخت / بنت ضرماء

انا لم اراء كلمة منقول الا بعـد تنويهك لانني دخلت مستعجل

مرة ثانية اقدم اعتذاري للاخت الكاتبة مع التقدير والاحترام

ولكم جميعا تحيااااااااااااااااتي

الرومـــانسية · #8 19-Jun-2005, 02:35 AM

هههههههههههههههههههههههههههه
هههههههههههههههههههههههههه

لاتعليق

يعطيك العافيه اختى على هيك موضوع