مشكور يابيع مشاعرك مشــــــكور=العام ذنب وهالسنه ذنب ثانـــــي
وش عاد اقول ولابقى شي مستور= ماطعتني يوم ابتسم لي زمانــي
لا تعتذر لو خــــــاطري منك مكسور= لا تفتكرني دام قلبك نسانـــــــي
لا لا تقول ان الليـــــــــــالي لها دور= شف من هو اللي كان فينا اناني
مدري تصنعت الغــــــلا زور في زور= مدري انا اللي حيل كنت متفانـي
مثل العمى ما تنفعه طلعة النـــــور =النور بعيون العمى ما يبانــــــــــي
عندي خبر لو جاك مني قصـــــــــور =لأقول انا مخطي وربي جزانــــي
لو شفتني قاسي عليك انت معذور= شفني من اول جرح لازلت اعاني
انا بشر مثلك لي احساس وشعور= واغتاض لامس الكلام بكيانــــــي
حتى وانا في قمة الغيظ مقهــــــور =بعض الحكي عيا يقوله لسانــــي
ابقولها لو قلت لي صابك غـــــــرور= مافيه احد ياخذ بقلبك مكانـــــــي
العام قلبي فيك هايم ومجبــــــــور =العام لامني جفيتك عصانـــــــــي
واليوم حبك في حناياه مقبـــــــــور= لو مادعيته للمفارق دعانــــــــــي
ذاك الهوى ماعاد لك فيه مقـــــدور =ابعد من ايام الرشي والسوانـي
مادمت راضي عن عذاني ومسرور= ملعون ابو قلب عليك يحدانــــــي