يالله يامفرج كرب من لجاله=ياخالق ٍ سبع السموات بيام
ياواحدٍ كل البسيطه حلاله=بيدك زمام الكون . من شرق في شام
سبحانك اللي عالم ٍ كل حاله=وعزيتنا يارب في دين الاسلام
بمعونتك ابدي وارد العداله=للي غدت مابين بايع وسوام
الهرج واجد واكثر الناس داله=والفعل عند اهل المواقيف مقدام
اشيل حملي وأرتكي لشتياله=وامشي قدم .. لاقالوا الطيب قدام
مالد في عين السفيه وضلاله=إلا ليا رد الخبر كذب .. وحطام
زاد الحكي . واخطا الهدف بحتماله=وشفت العرب حوله يرزون الاعلام
كنه خذا جوه وزين احلااله=وارخى على ذيك المواكير بفلام
يمدح ربوعه ! ماعلينا وماله=ماهو بهمنا طاح يافلان او قام
لكن لا يرجح علينا خباله=حنا نعرف العلم .. صبحٍ ومجهام
حنا نعقد كايده في حباله=وحنا نضده كان غرته الاحلام
لا يحسبٍ محدٍ يجي في قباله=وإنه خذا من مجد الاقوام مادام
ان كانها بالفعل !! لا واحلااله=يذكر زمان ٍ مالحق لحمه عظام
يذكر زمانٍ ماضمنته لياله=ومن كثر خوفه يسهر الليل مانام
زور من التاريخ علمٍ بداله=اصبح امير وباقي الناس خدام
ليته تريح مابلش اليوم حاله=ماعاد إلا مطير .. في ضلك أتضام
حنا دروع المجد وحنا رجاله=حنا صقور الارض . يافرخ الاشوام
حنا رجال العرف واهل الشكاله=وحنا زحازيح الوغا طول الاعوام
حنا كنوز الارض واصل الأصاله=وحنا علينا مايجي لوم لاوام
تاريحنا وسط الجزيره مجاله=امدون ٍ مع كل وافي وعلاام
محد جهلنا .. فالجنوب وشماله=افعالنا ماشابها راع الاقلام
فينا الشجاعه تنحدر من سلاله=ماهي حديثه يوم او عدة ايام
فينا الدويش الفيصلي . من لجاله=يبشر بعز ٍ ماحلم فيه او هام
الهارف اللي مابغينا بداله=زيزوم حرب وقت الاكوان ضرغام
قوي باس وكاسب ٍ كل طاله=شتت اساطيل ٍ يكفون الاكوام
وحد لنا الصمان من كل عاله=واخذ عليه اشهود واصكوك واختام
فيصل ينومس كل فعل أنتماله=قايد زحول امطير وامير وامام
هو الابوى ومطير كلهم عياله=للعز رباهم .. وللمجد .. أفهام
وعلوى علوّا شجعان حرب وبساله=علوى ياجاهلهم على الطيب ميدام
علوى حقايق مجد ماهم خياله=لطامة ٍٍ في خد هافي ولطام
عدوهم !! لو يعتزي في خواله=ماهو بسالم كان لشر جزام
إليا اعتزوا غط العدو في كباله=وليا غزوا ماردهم حوم حوام
تاريخهم يعط الفخر من خلاله=وافين مع كل المواقيف وأكرام
والعبدلي قرمٍ كريم أبخصاله=يسبح على بحر الشجاعه وبقدام
اللاد عبدله على كل قاله=إسلام للمسلم .. ولضلم ضلآم .
حول الحجاز وهضبة مع جباله=علم ٍ يعلم لأهل السيف تعلام
اهل الكرامه والكرم والجزاله=كمٍ عقيد ٍ حولوبه ! بلا خطام
حريبهم لاقام !! يطلب زواله=ذولا مناعير الزمن فعل وأتمام
العبدلي دايم على الطيب فاله=للعز والنوماس .. يجريبه ألهام
وحنا هل البيدا .. رجال الكماله=حنا نواميس الفخر بين الانام
حنا بريه أمكملين الجماله=تاريخنا بين التواريخ .. دوام
رجالنا لامن بغى الشي ناله=ماضد رايه جمع غانم وغنام
محدٍ بيقوى !! هيبته مع نزاله=يشهد لنا منهو على الحق فهام
برهان للعليا تراهم دلاله ..=كم معجزه ماجت بيدين الاوهام
نردع جموعٍ ضاريه .. للهزاله=ومنهو نوانا شر ! نجزيه بإعدام
فينا الضفر ! فينا القيم والبساله=والطيب مزروع ٍ مع عود وغلام
ماهمنا منهو !! يغرّه هواله=راسه نجزه !! مثل ماجز الأنعام
برهان ناصل كل طيب بوصاله=وياما ردعنا شيخ لابه وهمام
مطير اسم ٍ مايشكك حواله=الرقم الاول رقمنا بين الأرقام
أفعالنا ! ماتنحصر في مقاله=وموثقه مانجمت بيد نجآم
الطيب له إجابة ٍ في سؤاله=وحنا بحر يصعب على كل عوام
هذا كلام اللي على الحق قاله=امدح وأبصم فوق مدحي بالأبهام
لي حق ٍ اقصد فالجبال الطواله=وااطا على روس الأفاعي بالأقدام
والطيب مع كل القبايل زلاله=وكل ٍ على فعله يحكم بالاحكام
ولاهمني هرج ٍ تقوله حثاله=مادام راسي للنواميس .. جزام
وهذي قصيده ختمها والكفاله=من ذكر قوم ٍ رامت المجد بحسام
من هاجس ٍ تم الشعر وأرتكاله=من دون ربعه تمم البيت بإتمام
واعداد مازان السما في هلاله=واعداد من صلى وكبر ومن صام
صلوا على من ضلنا في ضلاله=نبينا اللي عزنا بدين الأسلام