عادي .. طاح الحطب ... وحلوه الحياة ....

[حـمـران الـنواظـر]

بعض من مشاهد الحياهـ اللي نشوفها كل يومـ


.. الاول ..

وحدة مزيونة بالحيل ،،وحبيبة ،،

بس تخون !!

وش اسوي بجمالها ؟؟

بياخذها الزمان و تبقى عجوز ..

عادي .. طاح الحطب .. وحلوة الحياة


.. الثاني ..
ملتزم ،،

يصلي كل الفروض ،،

و اذا تعب ،، فوت صلاة الفجر !!

واذا شبع راحت صلاة العصر !!

و عنده دش ،، و يكذب كثير

و اذا صحى الصبح ،، مشط اللحية

عادي .. طاح الحطب .. وحلوة الحياة



.. الثالث ..
غني و ظالم ،،

يطرد المساكين ،، و يستغل الضعوف

مغرور و فاسق ،،

و مجلسه عامر ،،

كلٍ يبهر له ،،

و مع ذلك يجمع حسنات ،، من كثر اللي يسبونه

عادي .. طاح الحطب .. و حلوة الحياة



.. الرابع ..
يكد يدرس و يشتغل ،،

لاجل يبني مستقبله ،،

تزوج و جاب عيال ،، ثم تقاعد ،،

صار يسكن في مكان ،، و أم عياله في مكان ،،

والسبب العيال !!

صار دار المسنين بيتهم ،،

عادي .. طاح الحطب ..و حلوة الحياة



.. الخامس ..
تغازل و تاخذ ارقام ،،

و تطلع مع هذا ،، و تواعد هذاك ،،

و يوم طاح الفاس في الراس ،،
بكت ،،

و راحت تشكي لامها غدر الزمان !!

طبطبت عليها امها وقالت:

ولا يهمك ،، سفرة لمصر ،، وشوية سيولة ،،

و ترجعين بنت ،،

عادي .. طاح الحطب .. و حلوة الحياة


.. السادس ..
مرفوع الكفن أبيض ،،

وصاحبه وسط البياض ،،

بعضهم يبكي ،، و بعضهم عادي

دفنوه ،، و تبكبكوا شوي

و اخر الليل سكارى !!

عادي .. طاح الحطب .. و حلوة الحياة



.. السابع ..
سيارة مسرعة ،،

و تدعس لها واحد ،،

مسكين هندي ،،

و العسكري صديق الطايش ،،

والخطا نصه على الهندي ،،

والباقي على أبو الطايش ،،

و في الليل ،، الطايش يلعب بلوت

عادي .. طاح الحطب .. و حلوة الحياة


.. الثامن ..
قارورة مويه ،،

ما تضره ،، طايحة في السيارة

يناظرها بغضب ،، زعلان منها

و يفتح الشباك ،، ورماها وسط الطريق

واذا اجتمع مع الشباب قال:

متى بنتحضر ؟؟؟؟

عادي .. طاح الحطب .. وحلوة الحياة


.. التاسع ..
اهم شي الثوب نظيف ،، و الشماغ مكوي ،،

و القلم ماركة ،، والساعة تضوي ،،

و الجزمة جلد ،، والسيارة عجب ،،

و تلفونه ما يسكت ،،

إما بنات ،،

أو البنوك تبي فلوسها !!

عادي .. طاح الحطب .. وحلوة الحياة



.. العاشر ..
سطحية ،، و مغرورة

غبية ،، و متكبرة ،، و يا ريتها حلوة

تبي زوج مواصفات ،،

ما يقول لا ،، ويكره الاستراحات ،،

لازم وسيم ،، و انيق ،، و متعلم ،، و دخله ممتاز

و يحب السفر ،،

و بعد سنين ،، تلاقي نفسها في الانترنت

تدور واحد يقبل بها !!

عادي .. طاح الحطب .. و حلوة الحياة



.. الحادي عشر ..
فتح الكمبيوتر ،،

و دخل للمنتدى ،، و كلامه ما يتعدى ان الموضوع روعة و رهيب ،،

و هو ما قراه و لا يعرف كاتبه ،،

بس يبي يزيد المواضيع موضوع ،،

ويزيد همومنا هم ،،

علشان يصير صاحب الألف موضوع ،،

و يتميز ،،

والمشكلة انه يتميز ،،

عادي .. طاح الحطب .. و حلوة الحياة



.. الأخير ..
الكذب اثم ،، ومع ذلك نستخدمه

و ندري ان هذا حرام ،، و مع ذلك نجربه

نتذكر السهرة و الفرح و السفر ،،

و ننسى الجالسين على كتوفنا ،،

و نتناسى ان معهم كتاب يسجل افعالنا و نياتنا ،،

كل شي محسوب ،،

حتى النظر ،،

نسينا ان ورانا يوم ،، علاماته قربت

ومع ذلك كلنا ناسين ،،

أن بقيت على حالك تتناسى ،، لازم تعرف

إن ذاك اليوم مهوب عادي !!

وانت الحطب !!

و ما به حياة !!

[حلا الحماديـن]

ياااااالله موووضوع قوي مرره ..

صحيح ان النااس صاروا يتهاونوون بشغلات كثيره وماتت قلوب الأغلبيه ..

الله يحسن خاتمتنا ويملأ صحفنا بالأعمال الحسنه ..

شكرا حمران النواظر عالموضوع ..

حمران النواظر

دمت ودام ابداعك

وموضوع مثل ماتفضلت اختي حلا

مهم ومشكور

[منابع الطيب]

حمران النواظر

ربي يعطيك العافيه ع الطرح

ربما يكون بعضها حقيقة مؤلمة ونراها وبعضها قد يكون فيه جفا وليست حقيقة

لكنها قد تكون دروس لكي لا يقع الإنسان بمثلها ..

تحياتي

[الغنــاوي]

موضوع رائع جدا ياحمران النواظر
يعطيك الف عافيه...
بس ترى مااكتب رد عشان تكثر ردودي
الا قريت الموضوع كامل...ومن جد مميز
تحياااااااااتي

[غرااام]

الله يعطيك العافيه تقبل مروري

[ســـيـــ الحميداني ـــوف]

حمران النواظر

طرحك ناااقوس يدق عالم الغفله والهوانه

الذى نتعايشه


للاسف كل ماسطرته حقيقى وواقعى ونراه يوميا

غفلت العقول اللهم اشفهم ولاتبتلينا

والخافى اعظم واااشد

دفاترنا بحاجه لتصحيح وتعديل

كما يصحح المعلم اخطاء تلاميذة

لابد ان نصحح مابى انفسنا اولا وبعدذلك نصحح للناس


الف شكر على هالطرح

[حـمـران الـنواظـر]

مــــــــــــــشـــكورين عالمـــرور

ويــعـطيكم ألـــف عافيه