ياعلاوي نجد علك مراديم السحاب=ديرة تربيت فيها يوم اني صغير
يا طبيب النفس وشو علاج الاكتئاب=اعطني وصفة علاجه تراى وضعي خطير
عشت في غربة حقايق وفي وضع اغتراب=والتجارب عرفتني على الشئ الكثير
شفت ناس ترسم الورد على صدر الغراب=والغراب اليا بغيت المس الورده يطير
استفدت من الذيابه ومن نبح الكلاب=و استفدت من الرغى واستفدت من الهدير
و لاكسبت الا معرفة عزيزين الجناب=ولا خسرت الا معرفه عديمين الظمير
اقترب لا مقترب شين بعض الاقتراب=ابتعد لا مبتعد شئ في حقي كبير
يا سؤالي كل ماطرحك ماالقالك جواب=مالي الا الصبر واهل الصبر توعد بخير
وصف خبلان الرخا مثل ضحضاح السحاب=يفرح العطشان شوفه يحسب انه غدير
للردي لو هو ولد عم لا تحسب له حساب=كم عزيز ذله الوقت بضيافة حقير
الدروس انواع تطبيق ولا انتساب=بس انا الي طبق الدرس قدام المدير
يا غريب ان مت شيلني اليا هاك الهضاب=حط قبري بين عنتر وابن عمه زهير
حطني في مقبرة عبس مروين الحراب=حطني بااعلا علم عبس مروين الشطير
وان عسرك الوقت نطلع ونرجع للتراب=ويارث الارواح الأ له الاول والاخير
اول الدنيا طرب واوسط الدنيا عذاب=واخرتها الموت والقبر وحساب عسير
ياجزيل الملك يا كافل رزق النياب=يا الاهي من عذابك برحمتك استجير
