ايه احبه والقلب شايل غرامه=واعترافي بالهوى ماهو جريمة
والعمر شمعة تنور له ظلامه=له حياتي كالنجم تضوي عتيمه
عشت اسولف به ليالي وبانسجامه=كنت اخبي بالحنايا له حشيمة
والهوى دايم فرح يسقي خزامه=والمسافة في غرامه مستقيمة
والنعيم الي خذلني في هيامه=كالهيام اللي جنيته من نعيمه
صرت اعني من غيابه واعتصامه=ولو حضر يجلس معي جلسة اليمة
والغياب الي طعن قلبي حسامه=والشكوك الي بدت ماهي رحيمة
يعتذر لي عن غيابه وانهزامه=كم يحاول بالكذب يخفي هزيمة
ماتجيني من شفاته ابتسامه=ولاغصوني زارها مرة نسيمه
والغموض الي سرقني في زحامه=من ظلامه مهجتي صارت سقيمة
صرت اتابع كل اشارة من كلامه=كن حروفه تشتعل نار عظيمة
قمت الاقي هالبرودة في سلامه=لوتبسم بسمته دايم عقيمة
مع ظنوني خافقي يضحك امامه=ومع عذابي بسمتي دايم حميمة
صرت اهوجس بالخيانة من مقامه=قمت اناظر في عيونه الاثيمة
ياجفوني احضني غدرة سهامه=ياعيوني اسهري ليلة يتيمة
حسبك الله من قوى يحمل خصامه=كم عذابي لو بقى لي بالخصيمة
شفتهم حين الغدر اطلق لثامه=شفتهم صدفة تحت صورة ذميمة
والعشق حاله ينازع في حطامه=من فعايل غدركم جثة جثيمة
الخديعة هي سواته وانتقامه=يعتبر حصد الجروح اكبر غنيمة
الخيانة عينها عين العدامة=والخيانة دربها درب العديمة
ومن يلاحق بالهوى زيف ابتسامة=ماجنى الا حسايف مع شتيمة
وماحصد غير المصايب والندامة=وما عرف طعم السعادة والشكيمة
ومن جلس فوق العشق باعلى سنامه=مايوافق بالثرى يدفن صميمه
قلت اسافر عن عذابك واضطرامه=الرحيل الي يناديني عتيمه
وان عطيتك بالغدر اعلى وسامة=ما وفيتك بالعطى قدر وقيمة
لاحشيمة في هواكم لا كرامة=ولاكرامة في لقاكم....لاحشيمة
كنت احبه والقلب يمحي غرامه=واعترافه بالغدر اكبر جريمة

ياتافه الناس تبطي ماتجي قدي=لاكبرت السالفه دمعتك مذروفه
ماتعرف الهزل يالتافه من الجدي=ماتدري ان البلد بالليل محيوفه
خلك بعمياك مع هاته على ودي=والياقربت الخطر غنيت معزوفه

رمانة القلب محرقها أنت بعيونك = وإلا عراويه قاضبها أنت بيدينك
يابعد فرقك على ناس ٍ يمارونك = لو يوزن الزين مالت به موازينك