يانديمي بالهقاوي ومخلفة النعوت = اختلف عد المسافات وانت تقوسها
بس انا لو لمتني بالتأني والسكوت = شايفن رسم الخريطه على قاموسها
قدرت الله ماعليها من المخلوق فوت = لو جميع الخلق تجمع لها وتسوسها
السبب عندي سبب بالاماكن والوقوت = بس تقصر قدرة الخلق عن قدوسها
للوفا واهل الوفا لو بغيت اجر الصوت = جاوبتني نجد بجبالها وحبوسها
وان ثنيت الصوت اطلع من الاعماق حوت = ماتحوش انيابها تطحنه بضروسها
في حياتي ماتذريت بيت العنكبوت = الهوى يلعبها والخشاش يدوسها
بالمواقف ماتعزر برديان السموت = ماتنومس عالم ساقط ناموسها
مايسر ولايضر المشني والشموت = شلة بهروجها ماتسر نفوسها
التحالف بالتخاذل وسراد البيوت =انهزم جساسها وانكتم جاسوسها
ماتت الافراح بصدور ناسٍ تاتموت = القهر في نفوسها والردى في روسها
مهفن الله حظهم يوم يهفون البخوت = الحقايق عندهم غير ملبوسها
كل نمام مخرب وكل اهوج مقوت = شاطرين يبدلون الصور بعكوسها
الوفا دايم وفا والرداى ماله ثبوت = قد خذينا من قديم الليالي دروسها
ماتظلل شجرتٍ طلع الاغصان محتوت =يابسه وعروقها قام يمشي سوسها