السلام عليكم ورحمة الله وبركاته
قصــة أبوزيــد وابن أخته يحي
هذه القصه يتخللها أبيات من القصيـــد أعجبتني فنقلتها لروعتها
السالفه تقول ( الله يسلمكم ) ان ابو زيد يومنه سافر يبي يدور ديار(ن) خصبة لربعه
وكان معه يحيى ولد اخته الوكاد انهم في اثناء الرحلة خلص الماء اللي معهم وياولد يمين يسار ...
عاد مالهم الا يدورون بئر يردون منه ... المهم انهم لقولهم بير مهجور
ولا فيه اثر ورّد فقال يحيى : خال هالبئر مهجور وانا خايف يكون فيه دواب ولى هوام
وقال ابو زيد: اسمع وانا خالك اللي كاتبه الله لك يبي يصير (ونعم بالله )
قال يحيى : اجل اتكلنا على الله ابنزل اعبي مويه
المهم ان يحيى نزل بهالبير وبدا يغرف بالدلو وخاله ابو زيد يسحب الدلو الى عنده
ومن ثم يرجم الدلو على يحيى مرة ثانيه ويعبيه يحيى مويه وابو زيد يسحب الدلو
مرة ثانية وعلى هالحال .... المهم لعل البير فيه داب ...
ولا انتبه يحيى لداب وانقزي يالداب هاك النقزه
اللي تسنها الدعيع على غفلة واقرصي يحيى وصرخ صراخ(ن) يروع
وقال لخاله ابو زيد يا خاااااااااالي : الحذر ما يفك من القدر
وقام يون يحيى بالبير خلاص ما عاد باليد حيلة ماله الا الموت الله يدفع البلا : فقال ابو زيد بعد ما سمع ونين وصراخ يحيى :
سمعت منك يا فتى الجود ونه = عساك منها يا فتى الجود سالم
قال يحيى :
انا سالـم منهـا ولانيـب سالـم = والراس ما تطوي عليـه الغمايـم
انا سالم لو ما ازرق الناب صابني = ضربني بنابـه واتقـى بالردايـم
وانا خايف يا خال هـذي منيتـي = ومن رافقك يا خال مـا رد سالـم
وحلفت انا لاارويك واروي ركايبك = واخلي الماء من على الحوض عايم
فقال ابو زيد :
يا وليد قم خم الرشا واحتزم به = خل اظهرك عن بير فيه الصمايم
وحس يحيى بالموت وقام يوصي خاله على ابنه الصغير وعلى اخته وزوجته يوم يقول :
يا خال خل الدوح والنـوح خلـه = وأعمل بقبري يا عطيب الضرايب
خل القبر في راس عيطـا طويلـة = وسيفي ورمحي حطهن لي نصايب
غـدي بنـات الهلاليـه يجننـي = يجذن على قبري بروس الذوايـب
ودعتـك يـا خـال ورع صغيـر = يلعب مع الصبيان وابـوه غايـب
احذرك أنا يا خال عن ضربة العصا = أو نزرة(ن) تودع قليبـه حطايـب
وقولوا لبنت أمي تغطي وتستحـي = لاجو لها الـورث فـوق النجايـب
وقولوا لبنت العم ترحل إلى أهلها = حرم عليه اليوم شـوف الحبايـب
وبعد هذا توفى يحيى وهو وسط البئر وقام خاله ابو زيد
وطلعه من البئر وحفر له هاك القبر ودفنه وقال ابو زيد وهو بجنب قبر يحيى هذه الابيات :
[دفقت على قبر الهلالـي قربتـه = وخليتها تسقي الرياض المجادب
وحطيب على قبر الهلالي جوخته = وتركتها تذري عليهـا الهبايـب
وحطيب على قبر الهلالي فتخته = في ماقع(ن) يشوفها كل صاحب
وعلقت على قبر الهلالي بكرتـه = وخليتها تعتب حوال النصايـب
قصه مؤثرة ومحزنه 
أتمنى تعجبكم مثل ماأعجبتني 
تقبلوا تحياتي
شوووق العيووون 
~¤ô§ô¤~ قصــة أبوزيــد وابن أختـــــــــه يحـــى ~¤ô§ô¤~ 
