قصيدة نشرت في مجلة المختلف بإسم شاعر لقب نفسه بـِ (البدوي)
نسب فيها أن الصمان لجماعته وأنهم احتموها في الأيام الماضيه
خلّها تبرق ورا الصمّان وتسيل المسيله =دام خيال المهور العوب في الشدّات منا
الزمل في مهجتي ممساه وهنيا مقيله =والله انه من ظعنا راح يرعى في ظعنا
والله إني ما أتنازل عنك يا الصفرا الاصيلـه =دام لي راسٍ يزوم و لي طواريقٍ تغنا
كلها لعيون ترفٍ سلم كفوفي جديلـه =لين سلمته بها الروح وعطيته ما تمنـا
يوم قالت يا حلالي قلت لبى أغلى حليلـه =قالت البارح جرى دمعي على الخدين لنـا
قلت في ربك وريضان الزهر هذي وشي له =ما سقـاها إلا غلاك اللي ربيناه وسكنـا
صاحبي وافري جيب اصويحبك عقبك اويله =لا خلت من ضحكتك ذيك الصروح اللي تبنا
لا رحل حلمٍ نزخرف له بيوت وننتمي له =وامحلت خضر الطواريق ودنا الليل وتدنـا
قبضيني يـا الهبايب غـرة الغيم وهميله =لين يرتع في خفايا الروح رعبوبٍ زبنـا
وارعدي بي يالرعود وفضفضي بي يا المخيله =واشرقي بي لااظلمن ذيك الوجيه وكلحنـا
واعتزي بـي مثل خيالٍ على عزوة خليله =ساعةٍ يستنشق البـارود كيف ويستجنـا
المشـاعر راهيه والدرب مخطور اويـبي له =مسرجـاتٍ لا ظمينـا للغمـام يوردنـا
والوعد لا رفرف البارق على راس الطويلـه =والهواجس تصطفق وغزيل السابق تحنـا
درهـمي بي يا ذلول الشعر صوب المستحيله =إن كسبنا الصعب وإلا كسبنا قولة فعلنـا
شاعرٍ شاف الجدي في رمسته راعي طويله =والهبايب تنفض غصون الشجر منا ومنـا
والزمن جافيه عقب الطيب من قبل أمس عيله =والوجيه اللي خذن منا الغلا ويشٍ عطنـا
والوفـا يلهث ورا بيبان نسّاي الجميله =سجّ ماكّنه شرب من كفي الطيب وتهنـا
أي عـناله ويعـنالي ويعـنيني ويعـنيله =عـالقٍ عـلق معـاليق العـلايق واعـلقنا
عِقِّب اللي يوم ضـاع وضيع الـوالي دليله =جـا يحدنّه عيون اللي على الضيق يحدنـا
روّح يدفدف مع السـارين بضلوعٍ نحيله =عقبهـا عوّد يلوج لسيّنه حنا وحنـا
يتطـاولنا فقير الحـال مغـتر بقـليله =ما درى إنه لو تعنّا للثريا ما وصلنـا
علّـموه يرشّ مقياله ويشرب من صميله =ماله عظامٍ يشيلنه عشان يصادمنـا
انـصحيه وفـهميه وسـولفيله واشرحيله =أنتي أخته علميه إن الـوطن هذا وطنـا
يا حبيبي للصمايل قلب وضلوعٍ جليلـه =استرح يالأجودي شوري عليك ولا تعنـا
ما نوردها على الجمهاه بعزومٍ هزيلـه =يوم جينا عزوةٍ يصفق لها الموت وتثنـا
أبشري يـا عزوتي لا حزم الصّايح شليله =والله ان أسوقها شلفاً في تجغم من زعلنـا
وأبشري باللي يشيل الحمل عنك ويرتكي له =شاعرٍ باسمك تغطرس باسمه الحرف وتغنـا
والعذارى اللي يشبن لاسمنا الوضاح ليله =جعلهن لا قصرن بيض الفعايل يفقدنـا
لا وطينا القاع شوف القاع منهي تنحني له =ما هدر واطبق على روس الجمال الا جملنـا
والوعد لا رفرف البارق على راس الطويله =والمشاعر تشتعل وغزيل السابق تحنـا
رد الشاعر / خالد محيسن الحميداني بهذا الأبيات موجهها إلى أصحاب المجلة
خلوا الشعار يا أهل الصحف كلٍ في سبيلـه =لو صنعتوا شاعرٍ بالزيف يبطي ماوصلنـا
لاتحطون الأسامي وجه لحـروف الرذيلـة =ان عجزتوا لا تـردون الخبـل لا يمتحنـا
الشعر روح الأدب والصدق بالشاعر دليله= والمعاني مفرداتٍ لو عصيناهـن عصنـا
والحيا شعبه من الأيمان برجـال الفضيلـة =خايفينٍ لاترد النـاس كلمـة كـذب عنـا
والمواقف واضحة والكل يدري وش حصيلة= لاجنيت الذنـب باكـر لـلاوادم لا تجنـا
لكن الموضوع طال وطافحٍ بالحيـل كيلـه =ومن طعن كبده بكفـه لا يحسبنـه طعنـا
اصبح الصمان فكره والشعر يمـه وسيلـه =كل من غنا على طاروق بالصمـان غنـا
لاهـي بـداره ؟ ولا دارن لبوه ؟ ولا لهيـلـه= الجمـال الـي تهادرلـه منوخهـا جملنـا
يوم دقلات السبايا والجموع اللـي مهيلـه =محتمين الـدار يالـلي طامـع منـا ومنـا
خلها تبرق على الصمان وتسيـل المخيلـة =من سكنها من رعاها من حماها غير حنـا
يوم وقتٍ راح ما خيلك اتطارد مثل خيلـه= دونها لو ما طعنـا بالحرايـب مـا سكنـا
أشهد إني يوم أشوف الناس لي ربع وقبيلـة =وافتخر دام أهل العـادات والـردات منـا
دون تقصيرٍ اباق الناس و الدعوة طويلـة =من تعرض عرضة اللقوات سموه المعنـا
ما نصـادم غيـر حكـامٍ بيارقهـا ثقيلـة =كم جموعٍ جت وعافت من وحمنا يوم جنا
عزوتي لا دخن البارود في خشـم الفتيلـة= يوم جيناهم ندق القـاع حنـا الـي طحنـا
لو تمنيته مثل غيـرك حـرامٍ مـا تجيلـه =ما يطبه غير رب الكون واللي في ضعنـا
عنه ابن هذال حديناه وشمل فـي مشيلـه= والعريعر عنه حدرنـاه يـوم إنـا نزلنـا
صوتيلـه يافجـوجٍ قافـراتٍ صوتيـلـه =من جهل قيمة رضانا ما عرف قيمة زعلنا
وإن سمحنا له زيارة عابـرة لـه سولفيلـه =عن مناخ وما حوى ساقان ولاعـن لبنـا
في زمانٍ فات كلٍ بس تركض وتحبيلـه =عاذرك حتى سقاط الناس شاخت في زمنا
منت قد الحرب ولا الضرب حتى ترتكي له= والعوارف خابرينٍ مـن يقـول إنا وإنـا
وانت مثل الي دفن راسه وطلع راس ذيلـه =لو نشدت الصلب والصمان قال انه وطنـا
وإن كان ردت للوطن والا الكرامه والقبيلـه= المهار مسرجـه وغزيـل السابـق تحنـا
ابك حنا مجدنـا لاقـام مجـدك ينحنيلـه= ما خبرنا لك بطولات وملاحـم يـا مهنـا
والرجل ما يفخر الا فـي فعـولٍ تنتميلـه= والعـرب جهالهـا تعقـل ليامنـا جهلنـا
دام فيه رجالٍ يعنيها القصيد وتنثنـي لـه =والله ان لا اكتب بيوتٍ لهـا الدنيـا تثنـا
لين أخلى لك زميل السوء يلعن في زميلـه= تبت ايدينٍ خذن منـا الفخـر ولا عطنـا
لا تسيل وادي بالـزور وتصـدق بسيلـه =والنجوم اقرب من اللي في خفاياك يخفنـا
عزتي للي سواتك كان شبت عزتـي لـه= كود سيفٍ يشلع الهامه على صفـرٍ تعنـا
والفضل للي حموا في شرعهم عابر سبيلـه= نم بأمان أخوان نـوره يالهبيـل ولاتمنـا
