نوٍّ حدر عزّاه لمخيّلينه= تقطع صلاة المستغيث بنصدها
مترادفٍ كنّه جبال المدينه= سودٍ حجب برّاقها في سددها
قامت تسوقه من هواه السكينه= من صادق المنشا تدافع قودها
ما طاح قطّار الحيا من غشينه= بأمر الولي جرعا طويلع وعدها
يوم أستوى بين القسومي وبينه= نقر له الشرقي وُوندق رعدها
مع فرعة الوادي غدا له رطينه= تلحاء الغصون المبذره من بردها
يفرح بها اللّي مارداته ظنينه= هاك العدود الراهيه ماوردها
كبده على مشروب ماها متينه= لاماءً قراح ولا صميلٍ صمدها
بالعون نكسات الحمايل غبينه= ماتنفع الفزعه بردّت سعدها
يشوف طيّبهم عوينه يهينه= باصابعه عينه يفضّخ بردها
احسبت وقفاتي عليكم ثمينه= اليوم عندي طلبةٍ مابعدها
ليا جالك الهرّاج من شامتينه= مستانسٍ في صدّها وأنتقدها
خلّه يسدّ اطراف شدقه بطينه= لايحسب إنّ فحوس كبده بردها
طيب المواقف مانبيعه بدينه= لياجت مواقفنا يسند مددها
فزعة هل الحرداء لراع الدّفينه= ماجنّبت ميقافها لو طردها
افعالنا عنها تقصّر يمينه= إن شافها طيب الهقاوي فقدها
مواقف منها يضيّع يقينه= يصبح عواقب زمرته ماحمدها
ماهو بطيب اليوم مستارثينه= عندك خبر رفع البيوت بعمدها
ماني بشرّاي النميمه بدينه= خيبة حصيله من قليله خردها
خطوى الهبيل اللّي سواة الطبينه= من قهرها بالقدر تطبخ ولدها
من ضمن ناسٍ بالمعادي ذهينه= ماشافت اللي بالمحارف رصدها
ان كان كلٍّ قام يظهر خزينه= والله إنّي لذوّقهم من الموت وأدها
كلٍّ لوريّه المناكر بعينه= بمطولاتٍ ماتحلّلّ عقدها
لين الكديش اللّي صدوغه سمينه= ينسى الهروج ولا يكمّل عددها
الصبر مزعلني بكثرة سنينه= الحال ساقمها وكبدي لهدها