ليلى عن الود مختاره تجافينـا= يا وقت ليلى سقا الله عهد غيّاتــك
الريم عقبك يريّحنا ويغلينـا= وعند اكحل العين عوّضنا خساراتــك
يا من لحسنهْ زمانْ الوصل لبّينـا= يوم الهوى كان من فنّك وخدعاتـك
كان الصبا فيك فتنه والعشق فينا= مثل المحامي يدافع عن خطياتـك
زاهي جمالك سبانا وكان يشجينا= بالسحر من حسن طرفك وابتساماتـك
قلبي الذي كم خدعته في الهوى اسنينا= ما عاد يقبل دموعك واعتذاراتـك
من بعد ما خنتني وارخصت ماضينا= حاولت لو بالعفو سمحان زلاتــك
كفايةٍ واعترافٍ منك يكفينـا=عن لا تحاولْ تعيد الوقت لى فاتــك
دع الايّام تحكم بين لاثنينا= ومسير الوقت يتحكم على ذاتــك
سعينا بالوفا لكنّ ما رينا= على صادق هوانا باتجاهاتـك
فلا نوفي لمن لا كان يوفينا= ولا نمشي على طبعك وعاداتـك
اليوم جينا بعدلٍ نطلب الدّنيا= سدّد حساب الشقا من دفتر آهاتـك
ولّى زمانك وعن حبّك تخلّينـا= وخَرَّت على الأرض بعد العزّ راياتك
ما عاد تفجّر في قلبي البراكينا=حمرة خدودك ولا مقرون حيّاتــك
لو كنت أنت الطبيب اللى بيشفينـا= لنفضّل العوق عن نحتاج وصفاتـك
هيهات نسمح لعذرٍ لى به اتجيينـا= من عقب ما خنت خسرانه قضيّاتـك
لا تحاول اترد ماضي له تناسينـا= يكفيك أنّا سكتنا عن مجازاتـك
على هاماتْ سحب المجد علّينـا= بعيدين المدى عن حدّ نظراتــك
تصافينا ولكن ما تصافينا= وعيد احساب نفسك في كشوفاتـك
وداوي جروح روحك لا تداوينـا=أظنّ أكبر عن امّابي إصاباتـك