حلق القرناس من فعل الدويله= والحمام من الطرب غنى هديله
والخيول من الفخر تلعب تحايا= العبيه والحمدانى والكحيله
وطبت الخفرات بالميدان تلعب = قامت الارقاب تومى بالجديله
ورزفت حمرا مطير بفعل ربعي= صفقتله كامل رجال القبيله
والسيوف من الفخر تبرق وتلمع = انثنة منه وقامت تنحنيله
والرياح الهوج بالاغصان تصرخ = والذياب المعط تقنب وتعويله
ماتباها الفخر قام يتباها = جر موال القصيره والطويله
في حمادين(ن)حميدين السجايا= كلن يحصل من اسمه له حصيله
وافيين وكاملين(ن)بالخصايل = الحرار اللي مكاسبها جزيله
كم بنو من شامخ الامجاد مجد(ن)= ساطع(ن) كنه سهيل لمن يخيله
وارثينه ورث من كابر لكابر= ويارثه منا بعد جيل(ن)يجيله
ردننا اللى مثل هملول السحابه= يستوي لنا وحنا نستويله
صبي الفنجال يابنت الاصايل =اشقر(ن)يعج به بنه وهيله
قدميه بلطف وليامن شربنا = ابشري بالمعجزات المستحيله
وغمضي في عينك الحورا ونامى= ارقدي في ظل حامين الدبيله
كم مشينا في بيارق كم طحنا = كم شيخن طاح راسه في شليله
متعبين الخيل واحفينا المطايا= والمهند من يدينا ذاق ويله
وترجع البل لا لحقنا في طلبها = ولا كسبناها طلبها عزتيله
ويامن الدخيل لا لاذ بحمانا = في ذرانا سنه مع ستين ليله
مدخلينه عق ماهو حق حنا = محتمينه لو يجيله من يجيله
والدويله قالها فينا الجنازه = يوم جانا في جموع(ن)كالمخيله
يوم دارت معركتنا وانتخينا = انتصرنا رغم حضرتنا قليله
طاح سبعه بين حامد والحميدي= ومسلط الحبشان وش سوى بخيله
كل ما ميل على الصابور مالت= وادبرت والدم فيها سال سيله
وانتصرنا في نهار الحرمليه = سربتين وقدمنا جموع(ن) مهيله
وصفنا فيها مثل وصف العساكر= خيل(ن)وفرسان وسيوف(ن)صقيله
ويوم صك الريع عنا في حريقه = فاتحين الريع لمطير الاصيله
فاتحه صدعان وعقوب المظفر = يوم ثار الهيج من راس الفتيله
ويوم ولد الربع وقف في نحرنا = راح ولد الربع تنعاه الحليله
صوبه غازي وجابه من ظهرها= ثم جاه حمود واشفابه غليله
ويوم ولد المسندى حول بنايف=اعتزى فاضي وحولبه مثيله
وصالح البراك له شيخه وفارس = جاه صالح نادر(ن)مثله بجيله
يوم كلن هاب راح وجاب راسه= ناطحه بالوجه ما يذبح بغيله
وكسبنا بجراب ثمانين حافر=فعلنا مع راعي الحكم وسليله
وكم كون(ن) معه بالتوحيد خضنا= لين جم البير فاح بسلسبيله
ورجهنت تحت حكم اخوان نوره = حكم عدل وخير ما نرضى بديله
وعصرنا الحاظر ربوعي ما توانو= كل صرح(ن)حاز بعمال(ن) جليله
لا فعل منا الرجل فعلن ينومس= قيل حميداني ويحري بالجميله
ما يفيد الرجل قول ابوي سوى = كان ما عنده من فعول(ن)تشيله
وكل فخرن تفتخر فيه القبايل = عندنا مثله بحجمه وبمكيله
وكل ما قلته تحت توقيع ربعي= شاهده جنبه ويبراله دليله
والصلاه ختامها على محمد =سيد(ن) ما قلت البيدا مثيله