عسى السحاب اللي مزونه مزابير = تلعج بروقه والرعد في خياله
يهل ودانه على منبع الخير = دارن صليب الراي شرقي شماله
يسوق غربيه ثعول الشخاتير = حد السهل مابين عرقه وجاله
على قبر شيخن يفك المقاصير= من لاذ في ضفه نعم في ظلاله
ذعار عوق اللي براسه سعاطير = وعز الوحيد اللي قصارن حباله
لامنها قلة عليه التباصير = في ماقفن يتعب عيال السلاله
له وقفتن يبعد بها الفكر ويحير = وقفة شرف ماهي مواقف رزاله
حلحيل ماحالو عليه المناعير = يفرهم فر الرشا للمحاله
مرحوم ياللي له معزه وتقدير = عند الرجال اللي لهم كل قاله
له عند سمحين الوجيه المسافير = مكانتن يصعب لغيره مناله
ياليت ماحالن عليه المقادير = لينن كلن يلحقه شف باله
لوكان ماجاني من الربع تقصير = لاشك وقفاته وفعله لحاله
مرحوم ياللي مايعرف المعاذير = دون الرفيق يسوق حاله وماله
منه الطيور اللي بليا دناقير = تشره بعالي ما اعتلا من جباله
ولو صار في بعضاة الاحوال تغيير= الساس طيب والبقاء في عياله