على الله ياهجوس الشعر يوم الشعر جاله شان = على البحر الطويل جبال هام السحب عاليها
الياهبت هبوب الريح منتها على الجيلان = معاصير اليا دار الفلك تجمع سوافيها
اليا هاجت بحور الشعر فيها شعري البركان = يهز الشامخات جبال ويدمر مبانيها
اليا هز المشاعر فكرة الشاعر سليط لسان = الياحن الخفوق وحرك الهاجس محانيها
اليا دكن بنات الفكر والهاجوس والالحان = تجي من ناتج المفهوم مثل الشهد صافيها
وانا حركني الموضوع والمضمون والكتمان = على بعض الاسامي نحترمها من عوانيها
تكلم يالساني يوم ناشي هيضه شقران =وناشي له بيوت(ن) ودي اقراها واجاريها
مدام ان الكلام مصيب والحبه على النيشان = على الرماي تحديد الهدف منشان ينهيها
مصيبه لا نصحت انسان مايقنع وهو غلطان =سواة اللي يبي يكحل عيونه لين يعميها
اليا استصغرك ناقص واعتبر نفسه هو الفهمان = ترى ضعف النفوس التافهه خبرة مواذيها
يصور له قرينه قدم عينه حكمة السلطان = يعيش اوهام هو ريس محاكمها وقاضيها
تشايله الروابع كل يومن له هدف واعلان = على قل السنع يكتب مواضيعه ويمحيها
سفيه المجتمع مثل العور في ديرة العميان = وراه العود رجله مع فيافي نجد محفيها
بنفسه حر من شقر الحرار امسح الريضان = مخاليب الحقب من صيد دود الارض مدميها
اليا منه تعلا للخضيراء يكسر الجنحان = بهداته خشاش الارض عقب الكثر مفنيها
ردي المعرفه لو يتجه للدين والايمان = اخير من اتباع النفس للشر ومعاصيها
وانا ماقول فاسد بس اقول انه قليل احسان =يمينه من وصاة العود ماتكثر حسانيها
دخل سوق المعاصي ماحسب للربح والخسران = يسج الرجل مع سوق الفلس والنفس مرضيها
يحسب انه صميدع ماحسب للعاقبه خيبان = على خيبة رجاه يكرر القصه ويرويها
رمى فيها القدر في ساحة الشعار وامره هان = على راسه جموع الشين حاضرتن باثاثيها
وانا ما اعم كل الناس به ناسن لها مكان = رجالن يلبسون الطيب يوم الطيب زاهيها
اكيد البحر الاحمر مانقص من شربة العطشان = وبقوعه غابت الاهوال شرس الحوت حاميها
عسى ربي يزيل اهل الحسد ويكثر الصدقان = يدوم الحب بين اهل الوفا من فضل باريها
جبرني ماقفي بالسالفه وامر المقدر كان = انا بعض العلوم الناقصه والله ما ادانيها