بسم الله الرحمن في كل الاحوال..=..ابدى بذكره ما ابتدي غيره بغير
بسم الله منزل تبارك والانفال..=..اللي يدل اهل البصر للتباصير
بسمه بديت وأطلبه رِفعت الفال..=..بالموقف اللي لجله إمن أمس وإعصير
استفزع بيوتي من الجال للجال..=..يالله تجملني بحضور المناعير
(ياكويت أنتي طيب في حشمة إرجال..=..ومطير ربعي تعشق الطيب والخير)
(ومادامك أنتي طيب والخير بك طال..=..غصبٍ على أعشقك لنّي من إمطير)
ورديت فيك الشعر مايلحق جدال..=..مصيونةٍ عن كل نقصٍ وتقصير
ودمي نبض بك داخل إعروقي وسال..=..ساقتني بحبك كبار المقادير
بس إن غلاك إخبال .. في راسي إخبال..=..وكان الغلا تقدير جيتك بتقدير
ياكويت لو أقدر أعيش إبك الأجيال..=..أعيش بك جيلٍ بأثر جيل ما آشير
هذا وأنا من دولةٍ بس رجال ..=.. منهم يساوي تسعه تقول ويصير
اللي يقولونه لياعد الأفعال..=..تاريخنا يدري به كبار وصغير
من السعوديه منابيت الأبطال..=..لكويتنا بظل الأسود المغاوير
ينقال لي هات الشعر والشعر قال..=..رسم الكويت أجمل من أيات تعبير
كتبت فيها الشعر وأعدل إن مال..=..دربه لعين كويتنا به تباشير
زليت من صافي تفاكيري إزلال..=..شعرٍ يجملني بصف الطوابير
وشكرا لداعيني لتحقيق الأمال..=..في إمصافح إخواني بهالمجتمع مير
عذراً إذا قصّر قصيدي بهالحال..=..أبياتي اللي كنّها بجوكم طير
جيت بغلا والخيل تحت أمر خيّال..=..وأنتم غلاكم كنّه طويق والنير
وإختامها كويت الغلا بحشمة إرجال..=..غنيت فيها القاف مالي معاذير