الشاعر سعود جمعان المطيري من الشعراء المبدعين
وهو صديق لي
وقد حصل له موقف مضحك قبل فترة قصيرة
يقول سعود إنه وهو بالمسجد بعد ماسلم الإمام قام شحاذ يشتكي أموره على المصلين لعلهم يساعدونه .. وهو يتشكى كان مركز عيونه على سعود جمعان المطيري .
وقد قال له سعود هالأبيات:
يا ابن الحلال اللي تشكى علينا=حنّا لنا بوضع علىالله مشاكيـه
كانك تحرى للعطا مـن يدينـا=عزالله إنك عندنا ما أنت لاقيـه
ماهو ردى بس أرثع الوقت فينا=ماعندنا ماناكلـه دون نعطيـه
وفى يوم من الأيام كان سعود المطيري جالس بمجلس وكان فيه شيخ يحدث ويقول من ضمن الحديث إننا بأعظم نعمة بتاريخ البشرية
قال له سعود : ياشيخ أنا عندي مداخلة
قال له الشيخ تفضل
قال سعود هالأبيات:
ياشيخ شخيت الضحى فوق ثوبك=وانته تروغ عن نحور الصواريخ
النعمة اللي بس ياشيـخ دوبـك=ماتحسب أكبر نعمـة بالتواريـخ
وإن كان هذا بالتحدث أسلوبـك=فعز الله إنك لقطة غليس ياشيـخ
وزماااااااااااان كان سعود طالع من المسجد ولقى وحدة رافعة يدها وتشحذ عند باب المسجد قال لها سعود هذه الأبيات :
يابنت ياللي بالمساجد تطوفيـن=كفي يدينك قبل نأخـذ ريالـك
حنـا ترانـا كلنـا مستحقيـن=ماهو أنتي اللي مستحقة لحالك
لو لا الحيا شفتي وزانك ثلاثين=أحد يمين منك وأحـدٍ شمالـك
مرفعيـن إيديننـا ومتقاعيـن=الموجب إن أحوالنا مثل حالك
وفى أحد الأيام قام سعود المطيري بفتح له حساب فى البنك وراح بعد كم يوم يبي يشوف كم في رصيده لأنه مرة مطفر وش طلع له على شاشة الصراف ؟ مع إنه متأكد من رقمه السري
أنـا لقيـت البنـك مثـل اخويايـه=مايقضي الحاجة إلى جـاه محتـاج
أمس الضحى مريـت كـل زملايـه=وكلٍ عطـى لـه بالمعاذيـر منهـاج
وضنيت باقي فـي رصيـدي بقايـه=وحركت ناصٍ حارس البنك هجـاج
ودقيت رقمـي صـح مابـه روايـه=طلع على الشاشة : لا داعي للإزعاج
وسعود ما عمره دخل البنك لأنه يقول :
يا أهل الوظايف قولوا الحمـدلله=على معوشتكم ولو رزقها ضنـك
أنا وجنسي رزقنا لـو وصفنـاه=حوذ الحنك مافيه زودٍ عن الحنك
ماطاح قرشٍ في يدينـا قرشنـاه=ودايم طفارى الله يجيرك ويامنك
البنـك لـولا لوحتـه ماعرفنـاه=من قل ماندخل على موظف البنك
ماغيـر نقـرا لوحتـه ونتعـداه=وإن قيل هذا البنك قلنا اتركه عنك
لاوا هنيـك يالغنـاوي هنـيـاه=ترقـد وحنـا بالدراهـم نمونـك
نفرح إلى من المعـاش استلمنـاه=ويهـج منـا قرشنـا ويتزبـنـك
والله يالو تصرف ربع ماصرفناه=ليصيبك السكر مع الضغط والتنك
ولولا جهدنا وجهدنا اللي بذلنـاه=ماتنفخ ذروبك وتمـلأ مخازنـك
مير المقدر مالنا غيـر نرضـاه=رزقك منا وسقمة أرقابنا منـك
طبعا والشاعر سعود جمعان المطيري
هو صاحب القصيدة اللي يرددون الناس بيتها الأول دايم
والقصيدة هي :
لاصار جدك ماترك لـك ملاييـن=ماهوب لازم تشتري لـه ضحيـه
قل له ياجدي جعلك من المناجيـن=والله ماتسـوى قيمـة البربـريـه
عقبتني للديـن ومصـارع البيـن=ومن زين طبعك كاتبٍ لك وصيـه؟
لو أنت ما أخذ لك من الخد حوشين=يوم الأراض بلاش وسـط العليـه
إن كان تلقاني من أهـل الدكاكيـن=مطنطـخٍ هالحيـن ميـة بمـيـه
لكـن ياجـدي ضحيتـك بعـديـن=إن سهـل المولـى ثمنهـا عليـه
حنا بوقتٍ شين وأشين من الشيـن=فيه الخـوي ماعـاد ياثـق خويـه
وسلامتكم جميعا من الحال الشين
