فقيـــــر..وعندي المال الكثير..

فقير وملبسي غالي حرير..

وياصاحبي الحافي الفقير..

ابنشدك..ابسألك وشهو الحصير؟؟

وابسألك:وشلون أنا آمر وانهي..

واذا حكيت قبل انتهي من كلمتي

يقاللي سم ويصير..

ولا شكيت من غفلتي طول زمنها

يقاللي:لاتشتكي..ماخلقت الشكوى لأمير..

وبسألك وشلون أنامع كل ذا..

أقول عن نفسي فقير..؟؟

ياصاحبي لا صار للضحكه ثمن..

وصاروا أصحابي كثير بس بثمن..

والوفاء مابه وفاء الا بثمن..

ابسألك: ماني فقيـــــر؟؟

ولا صارت أقوالي حكم..

ولا قالها غيري غدت حكي قديم..

ابسألك ماني فقير..؟؟

ولاصرت أنا مانيب أنا..

ولا غلطت قالوا صحيح..وكل شي اعمله يصبح عظيم..

ابسألك ياصاحبي ماني فقير..؟؟

وياصاحبي ابنشدك لامن جفتني دنيتي..

وابتدا الدرب الطويل اللي أبد ماينتهي..

وانتهى العز القديم..وماكنت اظنه ينتهي..

والموت بدد فرحتي..وحطوني في قبر صغير..

وحزنوا علي..وبكوا هلي وناس من ربعي قليل..

وارتاح من وجهي كثير..

وبقيت وحدي في حيرتي مابه أحد..

لاطال عمرك ولاتحت أمرك..

ماغير أنا وخوف ولحد وحساب قدامي عسير..

وقتها ذكرت اني من زمان..

يوم انه امهلني الزمان..

هذا ظلمت.!!هذا جرحت..!!ياما كذبت..

وذنوبي ماتحصى كثييييير..

وقتها الى ندمت..ونفسي كرهت..

عرفت ان الله كبير وان الهلاك اصبح أكيد..

واني أنا مالي رجاء..ولاهروب من الدجى..

من الجحيم..الا بأمل عندي وحيد..

ان الله غفار ورحيم..

ابسألك ياصاحبي عني أنا في وقتها..

ماني فقيـــــــر..؟؟؟؟