يالليّ تقول
للشاعر الكبير / فلاح بن مبرد الحميداني
ياللّي تقول أنّك على علم وقياس=خذ منّي الصافي بليّا نقاشي
أذكر تراي أبني كلامي على ساس=نظرات فكري ماعليها غطاشي
اللّي يهيّبني من المدح بالناس=كثر الهروج اللّي على مثل ماشي
أشوف في بعض المخاليق وسواس=يحطّ من نفسه بعيد المعاشي
ألقى مثل ماقيل ببنوك الأفلاس=سوالفٍ تجمع وتصرف بلاشي
مايشبع الجايع من السور بلحاس=وراس الظبي محدٍ ذكر به عراشي
ناسٍ مجربهم على كلّ الأجناس=حلوين الألسن والضماير غشاشي
إلاّ القليل اللّي بهم رفعة الراس=قلوبهم عند المواقف هشاشي
فكري لهم يندار والقاف ينقاس=على موازين الوفا بيع كاشي
