يا علي ضاق البال واستضرم الشوق=ما عـاد أحـس بفرحـةٍ وابتهاجـه
احسني من جو ألا فـراح مسـروق=والنفس لايجها عـن الـزاد لاجـه
عمري غدا للبيت والشغل والسـوق=يا الله دخيلك مـن حيـاة السماجـه
أمسى ويمسيني مـن الهـم داقـوق=شيٍ دعى اضلوعي لهـن ارتهاجـه
اطرق وعانق لي مع الفكر طـاروق=واخذ فـي الدنيـا سفـر وادراجـه
اسج وغيّب عـن الوعـي وافـوق=ومن تاهت دروبه على الله خراجـه
أعيش ليلي بين سابـق ومسبـوق=عسى الفرج له بالصبـاح انبلاجـه
واصبح وآنا متولـع البـال واتـوق=بعدٍ عـن الديـره وكثـر اللجاجـه
اركب علىاللي لامشى تقل ملحـوق=رنـجٍ ينـهـج لـلـوازم نهـاجـه
يحمل يابو وجدان في رفرفه طـوق=علامـة الجـوده ورمـز الخواجـه
شاريه يارع الولـع طـاق مطبـوق=توّه طلع فـي جدتـه مـن كراجـه
لقبل وهـو يمشـي ومترفـعٍ فـوق=كنّـه نحـر مزيونـةٍ فيـه عاجـه
غمارته عرشٍ مصمـم علـى ذوق=مايحـس ركابـه تعـب وانزعاجـه
مشيّه غنج ياخـذ مطباتـه ارفـوق=كن المطـب يـزود مشيّـه غناجـه
اليا عطى خطٍ من الوِيـل مطـروق=بقفايتـه كنـه يسابـق عجـاجـه
والعصر كان الله فكّـه مـن العـوق=ابشرت بالممسـى وحلـو المواجـه
في دار ابن ريّض علي راعي النوق=خفيف نفـس ويحرجـك بالهجاجـه
في مجلسٍ به طيّب البـن مسيـوق=فـي دلـةّّ ماحافهـا العـم خـاجـه
راعي كرم ضيفه مع الجزله وفـوق=عشـاه حايـل مايقـلـط دجـاجـه
المدح للي مثل ابـن ريّـض يلـوق=يفـداه خبـلٍ فيـه كبـر ورجاجـه
عقب العشى تحلى السواليف وتروق=بين القصيد وبين ضحكـة حجاجـه
ضني يحس بخاطري شـي مفهـوق=أكيد يـدري آنـي نصيتـه لحاجـه
ابشتكي له وابـدي السّـر مرفـوق=بآبيات دكتورٍ عجـز عـن علاجـه
يا علي آنا من فعل الأيـام مـدروق=الحض ساموح الصواديـف عاجـه
العالم الله كـل مـا خايـل ابـروق=من يم نجـد أحـس فينـي خلاجـه
والله لو مـا جـوّد القلـب معلـوق=انـه ليكفـخ مثـل كفـخ الزراجـه
خوفي من اللي صار تحدث به فتوق=تثر به اللوعـه مـرض وانفلاجـه
ولا يصير من أشهب الوجد محروق=يطفي كما ليـلٍ طفـى بـه سراجـه
وياعلي كان إن الفضاء بعيني يضوق=الله يفـزع لـي بسـرع انفراجـه

الادمي لولا المكارم والاخلاق=كالحنظله من ساسها لاورقها