يا علي ضاق البال واستضرم الشـوق = ما عـاد أحـس بـفـــــرحةٍ وابتهـاجه
احسنـــي من جــــو ألا فراح مسـروق = والنفـس لايـجهـا عــن الــزاد لاجــه
عمري غدا للبيت والشغــل والســـوق = يا الله دخيـلك مـن حـياة السـمـاجـه
أمسى ويمسيـــني من الـهــم داقـــوق = شيٍ دعى اضلوعي لهن ارتـهـاجـه
اطرق وعانق لــي مع الفـكـر طـاروق = واخـذ في الدنـيــا سـفـــر وادراجـه
اســــج وغيـــّب عن الــوعي وافـــوق = ومن تاهـت دروبه على الله خراجه
أعيش ليلي بـيـن سابـق ومــسـبـــوق =عـسى الـفـرج له بالصباح انـبلاجـه
واصــبح وآنا متــولع الــبـال واتـــوق = بعـــدٍ عـن الديره وكــثر الـــلـجاجـه
اركب علىاللي لامــشى تقل مـلحــوق = رنــجٍ يـــنهــــج للـــوازم نهــاجـــه
يحمل يابو وجدان في رفـرفه طـــوق = عـلامـة الجـوده ورمــز الــخـواجــه
شاريــه يارع الـــولع طـــاق مــطبوق = تـــوّه طلـــع في جدته من كـراجــــه
لـــقــبـل وهــو يــمــشي ومـترفعٍ فوق = كـــنّــه نحـــر مزيونةٍ فـيه عــــاجه
غــمارته عرشٍ مصــمــم عـــلى ذوق = مــايـحــس ركابه تعب وانزعـاجـــه
مشيّه غـنج ياخذ مــطــباتـه ارفـــــوق = كــن المـطب يـــزود مـــشيّه غناجه
اليا عطى خــطٍ من الـــوِيـل مـــطروق = بــقــفــايـــتــه كـــنه يسابق عجاجه
والعــــصر كــــان الله فـكّه مـن العوق = ابشرت بالـمــمـسى وحلو الـمـواجه
في دار ابن ريّض عـلي راعــي النوق = خفــيـف نـفـس ويحرجـك بالهجاجه
في مجـلسٍ بـــه طــيّب البن مـسيوق = في دلةّّ ماحـافــهــا العــم خــــاجــه
راعي كرم ضيفه مـــع الجـزله وفـوق = عشـــاه حايـــل مايقـــلط دجـــاجـــه
المدح لـــلي مثــل ابــن ريـــّض يلـوق = يفـــداه خــبلٍ فيــه كبــــر ورجـــاجــه
عـقب العشى تحلى السواليف وتـروق = بين الـقـصــيد وبـــين ضحكة حجاجه
ضـنـي يـحس بخـاطري شــي مفهـوق = أكـــيد يـــدري آنــي نصيته لـــحــاجه
ابشتـــكي له وابــــدي السّــــر مرفوق = بآبيـات دكـــتورٍ عــجــز عن علاجــه
يا علي آنا من فعـل الأيــــام مــــدروق = الحض سامـــوح الــصواديف عاجـــه
العالـــم الله كــل ما خـــايــــل ابـــروق = من يم نـــجد أحس فــيـــني خــلاجـــه
والله لــــو ما جــــوّد الــقلب مــعـلـوق = انه ليكـفــخ مــثــل كــفــخ الــزراجـــه
خوفي من اللي صار تحدث به فـتـوق = تثر به الــــــلــوعه مرض وانفــلاجـه
ولا يصير من أشهب الـوجد مـحــروق = يــطفي كـــمــا لــيــلٍ طفى به سراجـه
وياعلي كان إن الفضاء بعيني يضـوق = الله يــفـــزع لـــي بـــســــرع انفراجـه