كان الفقر يابنت الأجواد لي عيـب = تـرا المراجـل ياحسينـه غناتـي
أتعب على كسب المعاريف والطيب = مرخص على شان المراجل حياتـي
ولا المعيشه عايش(ن) عيشة الذيب = يومٍ(ن) يجوع ويوم يلقـى المباتـي
ورزقي على اللي يعلم السر والغيب = واللي كتـب بلـوح ملـزوم ياتـي
ماني بوارث مال قـارون وشعيـب = ولا ملكـت النيـل و لا الفـراتـي
راس مالـي بالوفـا والمواجـيـب = وفروض ديني من صيام وصلاتـي
وخوة صناديـدٍ جـزال المكاسيـب = فريس قـوم ولا تحـب الشماتـي
وأفرح بضيفي مثل طي المعازيـب = كسب الجماله والكرم من صفاتـي
وأدرى من المنقود وأدرى من العيب = يذهل عدوي فـي حياتـه سكاتـي
وأعتز في ربعن تحـل المصاعيـب = أهل الفعول المعجـزه المرعباتـي
أهل الوفا والطيب وحرش العراقيب = امطير ربعـي مرعبيـن العداتـي
ربعي ليا صكـت عليـه المغاليـب = هم مسندي با اللين و بالمعسراتـي
وأبفتخـر مـن دون ذم الأجانيـب = مـدام حمـران النواظـر عباتـي
يابنت زارك من قصيـدي مناديـب = أبيات شعري وأحفظيهـا وصاتـي
الفقر ماهو لا فضا البوك والجيب؟ = الفقـر فقـر المرجلـه يافتـاتـي.
والطيب يارث من تسـد المطاليـب = تموت وتبقـى علومهـا الوافياتـي
والمرجله مثل الذهـب فالمراقيـب = واللي عشقهـا ينطـح الموجباتـي
ومن لا كسبها شب ما جابها الشيب! = والعمر فرصة حي قبـل المماتـي
أما ذكروني مثل عذب المشاريـب = ولا أوقفوا دمع العزى فـي وفاتـي
والمودمـي لابـد مابـه عذاريـب = ولا ني معـدد بالقصيـد حسناتـي
لكن عطيتك عن حياتـي تجاريـب = يوم المراجل ساس ربعـي وذاتـي
وصلاة ربي أعداد خـط المكاتيـب = وعـدد طيـورٍ بالسمـا حايماتـي
على محمد صادق العلـم ومصيـب = رسول ولا تقبـل عليـه الزكاتـي

غربة وطن .. وإفراق ناسٍ عزيزين = وجهي شمال .. ودمعتي وسط عيني
ولولا الكفر .. خالفت درب المصلين = وصليت يم ديارهم .. ركعتيني